Ani qotadhee nyaadha dachii tatarsaasee
Koobiicha findigee raaree babaqaqsee
Kaachaa garagalchee giciiccaa buqqisee
Dacheerra facaasee dacheerra sooradha
Saawan koo bobbaasee dachaasee galfadha
Sangoota koon qota saawwan koo elmadha
dachee kaniin dhaalee lafa abba koorra
Abaan kan argate akaakayuu koorra
Yagutoo hin fuune hin saamne namarraa
Biyya namaa hindhayne biyya kootirrattii
Irkannoon koo rabbiif human kootirratti
Taakkuu takka hin ceene an dachii nammatti
Situu natti dhufee ufiif na roorriste
Shanee shanee jettee ofiif na doorsiiste
Bakka jireenna kootti dhuftee na barbaadde
Shanee arge jette ummata nat baaste
Koottaa bahaa jettee ummata sasbdee
Qowee an argee beeyne mormat na fanniftee
Namni kun shanee dhaa raasaa fide jette
Harka koo katiinaan duddubat na hiitee
Maatii koo ful durat qabdee na rashante
Wanta guyya Sanaa
Harrallee yaadadha ati yoo irranfatte
Kunoo akkas naan jette
Takka ufirra mari
Kaabaa kibba laali baha dhiha laali jette na zoorsifte
Akka itti du`uu fedhu qofa filannoo naaf laatte
Maatii koo fuul durat rasaasan na tumte
Ufiif na barbaaddee ani waa sin goone
Waan du`e setaamii an gaafas ani hin dune
Ani dhugaa qabaaf kan dharti waa nan goone
Eeyyen an shanee dha! Isa atuttuyxee jireenya dhoorgite
Cubbuu itti feetee hama fakkeesste
Yakka tokko malee rasaasan akoofte
Eeyyen an shaneedha
Hujii na dhoorgitee situ nat roorrise
Matii kiyya hunda sit beelat hambise
Shanee maqaa jedhu situ naaf moggasee
Jiruu na dhoorgitee sit biyyaa na baase
Bineensa na gootee namarraa na baafte
Haqa kiyya dhossa haqqii kiyya saamte
Gaafa na rashantu waan du`u na seetee
No ani ni jiraadha yoomillee hin du`u
Dhiigaaf imimmaan koo laayyot lafan bu`u
Ani yoomiyyuu hin du`u yoomuu ni jiraadha
Waan ati na goote sumarraa baafadha
Jiidha dhiiga kiyyaa xiiqiin sibbaafadha
Haqqii kiyya nyaatte hudhee si gaafadha
Eeyyen an shaneedha
An qeerro oromoo gaadisa abdii biyyaa
Isa ati fanniftee gubde qaama kiyya
Isa ati saree soorte du`aa kiyya
Isa ati cirtee taphattuu foon kiyya
Harrallee ni jiraa farru rabii kiyyaa
Haaloo koon baafadhaa abadan si dhiisuu
Hanga si balleesut mataan gadin ciisu
Ani haqan qabaa ati nan dandeessuu
Ani waan namaa hanee
Biyya naman dhayne
Mrga namatitti habbaa tokkon buune
Namat nat roorisee jireenya na dhoorge Wanta ani hin beeyne cubbuu ta hagoogee
Badii kiyyaan mallet laafaa na duguugee
Ati shita jettaa
Koot laali naan jette oboleessa kiyya na durat ajjeefa
Oboleettii tiyya naduran fannifta
Maqaa nat moggassett anaan shanessita
Ammas as deebitee kun shiftaa naan jetta
Doowalaa gadi galoo ati hiyyeesa nyaatta
Ana moo si shiftaa adda baasuu beeytaa
Kichuu meeqa nyaatte kichuu meeqa cirete
Qaama miidhamaa gotee nam meeqa hambifte
Qorqalbii saa miitee meeqa maraachite
Nama meeqa rashantee foon saree nyaachifte
Qabeenya irraa saamtee meeqa kasaarsite
Ati
nama kaayyoon qanabne kan garaaf jiraatu
kana qabeenya ummataa irraa saamee nyaatu
gad ciipsee gorra`u otoon inni waywaatu
maatii walit qabdee bakkatti rashantu
abba birta qabdee inta gudeeddu
kan nama ajjeeftee footoo irrat kaatu
ilma namaa qaltee kan saree nyaachiftu
ana mii shiftaan si`I ati waa hin hubattu
10/01/2026